UNIVERSITY OF MICHIGAN MUSEUM OF ZOOLOGY
Home > Research > PolyCone Project > Maimiimiraa i Rangiroa
Novema 2022 – Maimiimiraa i Rangiroa, taamotu Tuamotu
[Huriraa reo tahiti/Huriraa reo farani/Huriraa reo marite]
Ua tere mai o Diana Vergara e o Tom Duda i Avatoru, i te motu no Rangiroa no te fafa e no te hiopoa i te mau pupu i nia iho iho a ra i te pae tahatai e i tua. Ua ite raua i te tahi mau huru pupu i te vahi taa maitai. Ua haaputu mai raua i te huero pupu. Ua faito atoa raua i te mau pupu a tuu atu ai i roto i te mau hapaina miti. I muri ae, ua ohi raua i te tutae o te mau pupu tei titio, ua pata atoa hia te hohoa e ua roaa ia raua maa vahi io o te pupu. Ua rau te mau huru pupu itehia e raua, e 5 noa ra pupu, na nia i te huru pupu tataitahi, ta raua i tapea mai. Maoti te tutae, te vahi io e te mau huero i roaa mai, e nehenehe ai te atinu (parauhia na roto i te reo tipee te ADN) o teie mau pupu e hiopoahia. Na teie mau hiopoaraa atinu (ADN) e faaite mai te maa ta ratou e amu. E faaite atoa mai te atinu (ADN) i te mau huru pupu taae roa. E ite atoa hia te mau huru pupu tei ofaa i tera area tau o te mau hiopoaraa.
E piti vahi ta raua i hiopoa. Tei te pae tatahi hoe e tei tua te tahi, e 500 metera to raua atea (a taumi i o nei no te pata i te hohoa fenua Google Maps o tera na vahi). Tei te pae o te tauraa manureva na vahi e piti.
E vahi taha tei maitihia i te pae tahatai. Ia matai anae hia, e faai roa mai te miti i tera vahi. Te vai nei i reira te one, te ofai, te iriiri e te papa. E ite outou i tera vahi i nia i te hohoa faaitehia i raro ae.
I tua ra, e tairi noa mai te mau are i te vahi hiopoaraa, e raeahia 60 tenetimetera i te teitei te are. E vahi taha atoa teie, e anoi one e te remu. I te tahi taime, e itehia te mau vahi one noa e te mau vahi ofaifai. I raro ae, te itehia nei e piti hohoa. Te faaite ra te hohoa matamua i te vahi hiopoaraa ia tae i te taime paapaa e te faaite ra te piti i te taime e nanu ai te miti.
Ua roaa ia Diana raua o Tom piri i te 2 000 pupu, 1 100 o ratou i faitohia. Ua piri i te 200 tutae e e 200 atoa vahi io tei roaa mai. Ua rau te huru pupu i na vahi e piti atoa ra. Mea huru rarahi ae ra te pupu i tatahi e e pupu atoa ra tei tapoihia e te remu. Te huru pupu ite rahi hia i na vahi e piti, o te Conus ebraeus ia e te Conus sponsalis. Nehenehe e parau, a tahi ra te mau Conus ebraeus i tae ai i tua, no te mea rave rahi o ratou faito hua e rarahi rii. E ite outou i nia i te hohoa i raro ae te mau pupu no tatahi, tera ia apaparaa i nia, e te mau pupu no tua mai, apaparaa i raro.
Te hinaaro nei te manao e haamauruuru maitai i te mau taata tei rohi e tei tauturu mai no teie ohipa : Christophe Brocherieux no te Faatereraa hau o te arutaimareva no Porinetia Farani ; Tamatoa Bambridge, Serge Planes, Beatrice Tanseau e Tiphanie François no te CRIOBE ; Ben Hess e Taehwan Lee no te UM ; e Didi o tei faaohie mai i ta matou tapura ohipa i Rangiroa.
E hoi i nia roa